Geltokiko Ehungintza Foroak —REAS Nafarroak, Geltokik, Madre Corajek, Medicusmundik, Setemek, Emausko Trapuketariek, Nafarroako ehungintzako artisau emakumeek eta Laudato Si Taldeak osatua— irailaren 16 honetan, osteguna, Truke fest arropa-trukerako jaiaren edizio berri bat ospatuko du. Ekimen hau Iruñeko arropa-trukerako ekitaldien sarearen proposamena da, Iruñerriko Mankomunitateak eta Ehungintza Foroan parte hartzen duten erakundeek sustatua.

Parte-hartzea doakoa da, eta ez da aurretiaz izena eman behar.

Nola funtzionatzen du arropa-trukeak? Mekanismoa erraza da: parte-hartzaile bakoitzak egoera onean dauden gehienez bost arropa-ekarri ahal izango ditu. Horien truke puntuak jasoko ditu, eta, horren truke, puntu horien balioaren araberako beste arropa batzuk eraman ahal izango ditu etxera. Parte-hartzaileek ekarritako arroparen truke lortzen dituzten puntuak bertan beste arropa batzuekin truka ditzakete, edo hurrengo Truke fest edizioetan erabiltzeko gorde.

Dinamikaren helburua ehungintza-industria globaleko multinazional handiek sustatutako arroparen kontsumo, ekoizpen eta baztertze masiboak eragiten dituen ondorio sozial eta ingurumenekoen inguruan kontzientziatzea da. Horrela, kontsumo-eredu arduratsuagoak proposatzen dira, arropa gehiago erosi edo ekoitzi beharrik gabe armairua berritzeko aukera emanez eta oraindik egoera onean dauden jantziei bizitza berri bat emanez, baztertzea saihesteko.

Ekitaldiak, gainera, animazioa, berrerabilitako arroparen desfilea eta boluntariotzari zein Arropa Garbiaren Kanpainari buruzko informazioa eskainiko ditu. Kanpaina hori nazioarteko ekimena da, eta ehungintza-industria globalizatuaren eragin negatiboak salatzen ditu. Oraingo honetan, AGKren informazio-gunea modaren Trantsizio Justu baten aldeko manifestua ezagutaraztera bideratuko da. Manifestuak, besteak beste, Soldata Duinaren aldarrikapena jasotzen du, baita datorren irailaren 25ean ospatuko den Soldata Duinaren Aldeko Nazioarteko Egunari buruzko sentsibilizazio-materialak ere.